Tags
Kleinmond, Kleinmond Self-Catering Accommodation, Kleinmond Selfsorg Akkommodasie, Matriek Vakansie, Toeriste, Vakansiegangers
I stand corrected! Vandag was ons die slagoffers van ons eie vooroordeel, en ons kon maar net lag. What you resist, will persist.
Matrieks jol elke jaar na die eindeksamen lekker by Plett, en ons hoor die vreeslikste stories van wat in Margate aangaan, jaar vir jaar.
Die Burger loer in by die matriekmakietie in Plettenbergbaai.
Ons het vandag bietjie kos gaan koop voor die vakansie, sodat ons vrieskas goed gestock is en ons die aankoop van daaglikse vars goed vroegoggend kan afhandel, voor die vakansiegangers die winkels tref. As jy in ‘n vakansiedorp woon, moet jy aanpas, want die vakansiemense het net een maal per jaar die voorreg van sand, son en see. Hulle bring ‘n vibe na ons dorpe toe, en dit help ons ekonomie. Ons groei uit ons nate uit hier in Kleinmond! Daarom kyk ek maar weg as hulle ons omloop, ons spaadjieblommies vertrap en ons oor die algemeen stoomroller. Want hulle is Met Vakansie. En ek gun dit vir hulle met my hele hart, al voel ek partykeer uit my eie plek uitgeboer.
Ons lewe is so lekker rustig en kleindorps, dat winkels en verkeer ons gou ongemaklik maak. Groot winkelsentrums maak my fisiek naar, van al die vreemde energieë in my aura. ‘n Besoek aan Gauteng maak my deesdae paniekbevange, al het ek Pretoria en Johannesburg se kortpaaie almal geken en platgery.
So was die besoek aan Hermanus en die supermark vandag amper te veel vir ons, en MaanMan reken toe as ons gaan lunch by ‘n plek buite die middedorp, sal dit stiller wees, en nie een van ons twee is toe lus vir die spul seuns wat loop en slinger in die strate nie. Gedagtig ook aan ‘n vriendin se waarskuwing vanoggend oor die “gesuipte matrieks” is ons dorp-uit, maar waar ons nog oor die see kon sit en kyk hoe wild slaan die skuim teen die rotse.
En waarin loop ons ons vas? In twee láng tafels vol matrieks. Ons gaan sit toe maar aan die verste punt weg van hulle. Neffens ‘n vrolike groepie van ses ‘volwassenes’. Foutjie. Groot foutjie. Want binne ‘n ommesientjie het die paartie aangegroei, en blyk toe ‘n verjaarsdagviering te wees. ‘n Surprise paartie. Kort-kort het daar gilletjies gekom van Oh-mi-Ghoood.. What are you doeehing here!!! En die proppe het geklap en die drank het gevloei en die rook het getrek en die gilletjies het al harder geword en hoe meer hoe harder en ‘n glas het gebreek en hulle vieslike hond het aan my kom lek en dit was absoluut geen plesier om naby hulle te sit nie. 40-Somethings wat hulle soos hooligans gedra. Locals.
En die matrieks? Sit ewe stemmig en eet hulle sushi. Nie soveel as ‘n squeak uit die blombekkies nie, die meisies drink Appletizer en hier en daar het een ‘n bier gewaag. Ordentlike kinders.
Nee. Hulle is nie almal so nie… (Met apologie aan Jeanne Goosen)
Pingback: Kopskuiwe « MaanKind
Caleb Ramacey Carsuteldo said:
die nageslag van diegene wat die gelofte afgelê het en almal wie se toekoms deur die uitkoms daarvan geraak is.
LikeLike
murphy said:
‘n Goeie uithaak op sy tyd het meriete. Maar dan gaan doen jy dit in die bosse waar niemand jou kan sien nie en jy niemand pla nie.
LikeLike
attie said:
Stem 100% almal is nie engeltjies nie en almal is nie duiweltjies nie. Ek dink steeds Matriekvakansie is ‘n gesprek wat ouers en kinders oor moet gesels. Ouers moag nie illusies hê oor wat op matrievakansies (kan) gebeur nie.
LikeLike
MaanKind said:
Ek is net soooo dankbaar dis amper tyd vir kleinkind se matriekvakansie, en dat ons nie meer kinders het om oor te kommer nie.
LikeLike
Toortsie said:
(Op die burgerbandradio): “Maankind, Maankind, kom in!! Maankind, WAAR is jy?” Of is jy so besig met jou gastehuis? Dis mos nou seisoentyd. Ons mis jou!
LikeLike
MaanKind said:
Besig, besig!
LikeLike
Reinhardt Möller said:
Oulik geskryf! Dit is so waar. Hier by ons in Aus is daar ook jaarliks die stories van al die “schoolies” wat Surfer’s Paradise op die Gold Coast invaar en moles maak. Met ‘n dogter wat self hierdie jaar ‘n “schoolie” was het ek dit van bietjie nader bekyk en sien dieselfde ding. Ja, jy kry jou vrot appels in die kassie, maar oor die algemeen lyk dit darem of ons as ouers ‘n mate van beskawing by hulle kon tuisbring die laaste 18-odd jaar.
LikeLike
MaanKind said:
Mens kan maar net jou hande saamvryf en jou duime hou en jou tone in die sand steek en hoop dat hulle ongeskonde anderkant uitkom. Want groot word hulle wel.
LikeLike
pienkpantoffels said:
Jip, mens veralgemeen baie vinnig! Nie alle matrieks wat matriekvakansie hou is varke nie en nie alle volwassenes het maniere nie.
LikeLike
MaanKind said:
Ons het ons daardie dag doodgelag oor die ironie!
LikeLike
Jan Twak said:
Ek was net so vroom en gewyde matriekleerling.
LikeLike
MaanKind said:
Ek is seker, Janneman, in fact, ek is heeltemal oortuig…
LikeLike
Son said:
Die ATKV is nou besig met ‘n oulike program, waar hulle hul oorde oopstel NET vir jongmense vir die eerste week van vakansie. Daar kan die jongmense dan vakansie hou en tekere gaan sonder dat die ouers hoef bang te wees hulle verdrink in die see of jaag iewers in iets vas met ‘n kar. Daar is ook oord toesighouers, wat darem sorg dat alles nie heeltemal hand uit ruk nie.
Ek werk saam met heelwat jongmense en hulle het (meesal) baie beter maniere as die ouer mense 🙂
LikeLike
MaanKind said:
Ek vind nogal by die gastehuisdinge ook dat jongetjies baie respek toon, en oor die algemeen skoon agterlaat. Ek wil niks hoor van die ‘hedendaagse jongmense’ nie. Daar was altyd uitsonderings, en sal altyd wees.
LikeLike
Xena Phoenix said:
Ek dink daar is dalk meer goeie jongmense as wat almal wil glo. Selfs nog meer as wat jong mense dink daar is. Defnitief die meerderheid.
LikeLike
MaanKind said:
EK stem, Xena. Ons moet ons kant bring dat mense ook van hulle hoor. Soos ek vir Rika sê: Dis maar soos alles, Rika. Trap een dominee skeef, dan skree die koerante. Iemand maak misbruik van sy Bybel in die hof, dan skree dit weer, tipies Christene. En tog is die meeste Christene wat ek ken wonderlike mense, vol naasteliefde.
LikeLike
Rika Du Plessis said:
Jy is reg, almal is nie so nie, maar diegene wat wel so is, is die wat sommige mense dan die algemene indruk van swak gee. Ek het al ondervinding in restaurante van beide soorte gehad, so ek weet waarvan jy praat.
LikeLike
MaanKind said:
Dis maar soos alles, Rika. Trap een dominee skeef, dan skree die koerante. Iemand maak misbruik van sy Bybel in die hof, dan skree dit weer, tipies Christene. En tog is die meeste Christene wat ek ken wonderlike mense, vol naasteliefde.
LikeLike
Slakkelak said:
Dis maar menslik om te oordeel, en ons doen dit almal so maklik! En mens moet vertel van sulke oulike kinders, sodat ouers nie te veel horries kry as hulle kinders wil gaan nie. Ek praat van net nou die dag se persoonlike ondervinding. Dit was vir my BAIE swaar om my dogters te laat gaan, maar ek het, want hulle moet hulle eie vlerkies groei om te kan sierlik vlieg. En lewensondervinding is al wat daardie vlerkies laat groei.
LikeLike
MaanKind said:
Ag hier is net sulke oulike kinders in ons dorp ook, ek kyk maar net na die twee hier oorkant ons.
LikeLike
Toortsie said:
Ek weet almal is nie so nie. Ek weet van ‘n groepie baie oulike matrieks wat op Struisbaai was, wat hulle goed gedra het en ‘n relatief skoon huis agtergelaat het.
LikeLike
MaanKind said:
Ek ken ook sulke kinders. Ek dink mense veralgemeen maar weer net oor die uitsonderings, wat jy maar oral en op elke plek kry
LikeLike
Senings said:
Dalk was hulle nog babalas van gisteraand…
LikeLike
MaanKind said:
Nee wat, ek dink dit was die nerd groep, almal se hare was netjies ook!
LikeLike
Jan Twak said:
Nee, glo my. Sushi, Appletizer en babbalas loop nie op een pad nie. Ek weet.
LikeLike