Tags
Britte het stywe bolippe
Amerikaners is luidrugtig
Afrikaanse mans dra two-tone hempde
Grieke is olierig en Italianers knyp meisies se boude
Almal in Orania is agterlik
Mormone is veelwywers
In Suid-Afrika loop leeus in die strate
Nee, natuurlik is niks van bogenoemde waar nie! Waar kom ons tog aan persepsies en veralgemenings wat so maklik rondvertel word asof dit waar is? Dis ‘n ding wat ek oral sien waar ek kom, ons het verkeerde persepsies van mense in ander lande en van ander kulture, en hulle van ons.
Om te reis is ons passie, en ons sal afskaal op ander dinge, maar ons probeer soveel moontlik reis, in Suid-Afrika en oorsee. Dis vir my heerlik om meer te wete te kom van ander kulture. So het ek twee groot goeters op my lysie afgetiek hierdie jaar, om meer te wete te kom van die LDS-geloof (Mormone), en Orania te besoek. Ons het die voorreg gehad om by gesin te eet in Salt Lake City in Utah, waar die groot Mormoonse Tempel ook is. Sagte, vriendelike mense deurgaans. Een ma, een vrou. Besonder gasvry daarby!
Hoe lyk dit in Orania, en hoe lyk die mense, wou meer as een mens weet toe hulle hoor ons was daar, só asof hulle nou anders sou lyk as op enige ander plek.
My indrukke was baie neutraal. Ons het oorgeslaap in ‘n baie netjiese chalet, heel bekostigbaar boonop. Die uitsig was pragtig, en die ete by die restaurant heerlik. (Strate beter as enige iets anders wat ons verder langs die N1 te ete kon kry.)
Die mense waarmee ons in winkels en by die restaurant en akkommodasie te doen gekry het, was vriendelik en behulpsaam. Hulle kon net sowel in enige dorp gewees het. Daar is niks agterlik/armsalig soos dit dikwels uitgebeeld word nie. Nie waar ons was nie.
Die dorp en huise self? Vergeleke met wat? Vergeleke met ons mooi kusdorp, steek Orania maar af. Vergeleke met ál die ander dorpe in Noord-Wes en die Noord-Kaap waardeur ons gery het, lyk dit besonder goed. Die strate is netjies, die tuine versorg, maar nie móói nie. Iets het my gepla, maar ek kon nie my vinger daarop lê nie. MaanMan het dit perfek opgesom: Ek sien te min lewe. Daar is niemand in die tuine of in die strate nie. (Miskien is ons maar gewoond aan Kleinmond?)
Regsheid word nêrens genoem nie, maar oral geïmpliseer, in name van besighede, en alles is getooi in oranje, wit en blou. Om die waarheid te sê, ek het min ander kleur gesien. Die plek is valerig. Te veel van dieselfde ding.
But I see your true colours shining through
I see your true colors, that’s why I love you
So don’t be afraid, to let them show
Your true colours, true colours
(Phil Collins)
Ons hou van reis, van verskeidenheid van kulture, kosse en smake. Ek sou gek word as ek die hele tyd moet woon en werk op ‘n plek waar almal eenders oor dinge dink en voel. Hoewel dit seker ook weer ‘n aanname is, dat mense in Orania dieselfde oor dinge voel.
“The world is a book and those who do not travel read only one page.”
― Augustine of Hippo
Pixie said:
Wel nou kan jy darem se “been there,done that.”
LikeLike
MaanKind said:
Presies! Ek wil self dinge beleef, nie hoor hoe ander dit ervaar het nie.
LikeLike
Jane Steenkamp Myburg said:
ek het geniet om dit te lees…
LikeLike
lidiatheron said:
Oor die dorpie kan ek self niks sê nie, ek was nog nooit daar nie, maar vriende wat daar was, het gesê hulle het gewonder hoekom daar nog ‘n bo- en onder- dorp is.
LikeLike
Jaco Kleynhans said:
Lidia. Ek woon in Orania en hier is geen onderdorp en bo-dorp nie. Ons het sedert die stigting van Orania met die gegewe gewerk dat die dorp uit infrastruktuur uit die 1960’s toe dit ‘n Waterwese Konstruksiekamp was, bestaan het. Vandag werk almal in Orania egter om verskillende woonbuurte te integreer en woon mense van verskillende inkomstevlakke saam in dieselfde woonbuurte. Die persepsie oor ‘n ‘bodorp en onderdorp’ is dus totaal en al verkeerd.
LikeLike
MaanKind said:
Nee jinne, Lidia, ons het dit glad nie so ervaar nie, inteendeel.
LikeLike
Net Ek said:
Ek weet nie, ek is baie undecided oor Orania!
Ek dink ek weet te min om ‘n opinie te hê oor dit, maar ek was ook al vrek nuuskierig om te sien hoe dit daar lyk. Dankie vir die foto’s!
LikeLike
MaanKind said:
Ek is bly ons het gegaan. Ek het ‘n ewige hekel daaraan as mense doelbewus probeer om persepsies te skep van iets.
LikeLike
Lewies Mymer said:
Ek was ook al daar, nogal op 16 Desember, net na die verrigtinge daar aangekom. Geen agterlikheid nie, maar ‘n floers van verlatenheid. Die dorp self het vir my half verwaarloos gelyk, tuine oorgroei ens. En ja, die gebrek aan mense in die strate het my ook opgeval. En daai plestiek koeksister. Nee wat.
LikeLike
MaanKind said:
Dis vir my net so half onregverdig dat die mense as agterlik uitgebeeld word. Al is daar niks wat vir my sê kom bly hier nie.
LikeLike
Jaco Kleynhans said:
Lewies. 16 Desember is en behoort vir die Afrikaner ‘n dag van oordenking te wees. Dit is hoe ons dit in Orania beskou en as die dorp dus op 16 Desember stil en verlate lyk is dit omdat mense juis hiermee besig is! Ons dorp is besig en vol aktiwiteite, maar lyk nie soos ander dorpe nie omdat hier nie mense rondsit en niks doen nie. Ons het ‘n 0% werkloosheidskoers en mense is dus almal heeldag besig om te werk en hulself besig te hou. Dit is maklik om te sê tuine hier lyk verwaarloos, maar wys my nog ‘n dorp in die land waar die besigheidseienaar, vullisverwyderaar, skoolhoof en skoonmaker almal in dieselfde straat woon. In die meeste dorpe in stede in Suid-Afrika word hande-arbeid deur bruin en swartmense gedoen wat erens agter die bult in hul eie woonbuurte woon. Daar waar die middelklas en rykmense woon is alles goedversorg en netjies. In Orania woon almal bymekaar en is dit te verwagte dat daar verwaarloosde tuine en erwe sonder blommetjies gaan wees, want daar woon mense wat R4000 of R5000 per maand verdien en vir ‘n gesin daaruit moet sorg. Die koeksistermonument is nie plastiek nie, maar wel van veselglas gemaak. Dit is toevallig die gewildste besienswaardigheid in Orania en mense ry spesiaal hierom om dit te sien.
LikeLike
MaanKind said:
Dankie vir jou antwoord, Jaco. Ek waardeer dit. Dit maak sin wat jy sê oor besigheidseienaar, vullisverwyderaar, skoolhoof en skoonmaker wat almal in dieselfde straat woon. Die mooiste was vir my die beeld van die seuntjie wat sy moue oprol. My grootste teleurstelling was dat ek nêrens pekanneute kon kry om te koop nie.
LikeLike
pienkpantoffels said:
Ek wou ook nog altyd daar gaan loer. Love jou foto’s
LikeLike
Sonn said:
Dit klink vir my dis net TE. Maar ek sal ook eendag self gaan kyk
LikeLike
MaanKind said:
Dis wat ek ook wou sien. Self.
LikeLike
The Rider said:
Dis nou een van die min plekke in SA waar ek nog nie uitgekom het nie… dalk moet die volgende motorfiets trippie Kaap toe maar hierdie draai insluit… maar dan is daar ook nog Koffiebaai wat ek so bitterlik graag wil sien…
LikeLike
MaanKind said:
Hierdie is nie so groot draai nie hoor
LikeLike