Tags
Dit lyk asof Beurtkrag vir die volgende ruk met ons gaan wees. Hoewel ongerieflik, is daar niks wat ons as gebruikers kan doen, behalwe om die lewe vir onsself so maklik as moontlik te maak nie. Enkele wenke wat sommige mense dalk kan help:
- Bring jouself op hoogte van die beurtkragtye in jou area. Kry dit hier. Druk die skedules uit, jy kan dit nie gou opkyk as die krag af is en jou tablet pap is nie.
- Eerstens – Onthou dis nie jou lewensmaat of jou kinders se skuld nie, dis vir hulle net so ongerieflik soos vir jou.
- Tweedens – Skuif jou kop. Daar is baie dinge wat ons kan doen wat nie afhanklik is van elektrisiteit nie. Pak ‘n laai reg elke keer as die krag af is, of sorteer jou ou foto’s. As dit donker is, kyk of jy ‘n verskietende ster sien, dink ‘n bietjie oor jou ou sondes, of gesels met jou gesin.
- Bad sover moontlik wanneer daar warm water is. Bietjie verandering van roetine doen mens wondere.
- Sorg dat jou foon en ander toestelle gelaai bly. Hou die tye dop wanneer ons wel krag het en laai jou goeters in daardie tyd..
- Hou kos in die kas wat nie gaargemaak hoef te word nie. ‘n Blikkie Tuna of sardiens is heerlik saam met slaai. Dis somer, groente is gesond.
- Wanneer jy iets kook, maak ekstra, om in die yskas te hou. Dis makliker om iets warm te maak as om iets gaar te sukkel op ‘n gasstofie. Maak seker dat daar altyd iets is om te eet wat nie gaarmaak vra nie. En ja, soms is Provitas met Bovril en ‘n appel ook reg.
- Maak die kinders deel van die beplanning, dalk leer dit hulle om huiswerk betyds te doen.
- Maak seker jou gasbottel het gas in. En die nie-rokers moet sorg vir vuurhoutjies!
- Goeie ou flitse vir nood maak lekker lig, om die kerse te soek. Maar as jy jou tye dophou, is alles mos reggesit, of hoe?
- As jy ‘n kragopwekker gebruik, maak seker jy het petrol.
- Beraam nou verder planne wat jy sou doen as jy die land regeer het. Ons weet mos, ons kan dit almal beter doen.
This too shall pass …
scrapydo said:
Dis nou regte positiewe dinge om te doen en dit is maklik ook. 2008 was ons krag altyd 5-9 saans af. Gelukkig in die somer is dit nog lank lig en kon daar nog gelees of boeke gemerk word. Geen tv, radio of lekker warm ete! Toebroodjie het ook heel goed afgegaan. Gasbottel en stofie werk om n teetjie te kry. Vir my het dit gevoel of mens rustger kon raak omdat jy nie regtig iets kan doen. Ons het selfs ons VLU vergaderings met kerslig gehou = heel gesellig.
LikeLike
MaanKind said:
‘n Snaakse ding gebeur elke keer as dit ons Beurt is. Die oomblik wat die krag afgaan, is dit asof ek vaak word, en net wil voete opsit en ontspan. Ek moet net keer of ek raak aan die slaap. Dis of daar ‘n vreemde rustigheid saam met die stilte neerdaal. Is ons huise al so ge-elektrifiseer met al die goeters dat dit ons gespanne maak sonder dat ons dit weet of besef? Die oomblik wat alles so begin aankliek, vóél dit net anders.
LikeLike
scrapydo said:
Ek dink die “lig” jaag n mens om voort te gaan met alles waaraan mens kan dink om te doen!
LikeLike
Pingback: Van negatief na positief | Toortsie, Kameel en Bokbaaivygie
Son said:
En toe het ons so ver net een dag beurtkrag gehad. Wonder wie het vir Eskom skrikgemaak.
LikeLiked by 1 person
Toortsie said:
Dankie! Laat ek DADELIK my tablet gaan laai!
LikeLike
MaanKind said:
Alles klink eintlik so logies, en tog word ons onvoorbereid gevang.
LikeLiked by 1 person
Spokie sny spoor said:
Ja, goeie wenke. Mens moet maar voorbereid wees vir enige gebeurtenis.
LikeLike
rondomtaliedraai said:
Dankie dit klink sinvol
LikeLike
MaanKind said:
Plesier! Dis seker aardig om alleen in die donker te sit? Dis darem beter met 2 asems…
LikeLike
rondomtaliedraai said:
Ek woon mos nou in ‘n aftree oord. Iemand moes gaan kerse koop laas toe ons krag af was. Ons het erg geskarrel … hier is daar altyd iemand wat slegter af is as jy. Daar is nou mense in die sorgsentrum Hulle sal maar ‘n kragopwekker moet kry … as die krag af is werk die klokkies ook nie.
LikeLike